Во оваа сесија вниманието го насочуваме кон зајакнување на целата задна линија на телото - грбот, глутеалните мускули и нозете. Одличен избор за сите оние кои имаат тенденција да ги држат рамениците и торзото во заоблена положба, подвиткани нанапред. Преку варијации на положбата Шалабасана или скакулец, телото го поставуваме во екстензија и, работејќи „против“ оваа тенденција и гравитацијата, силно ги активираме споменатите мускули. Пробајте, видете кои елементи од овој сплет вам најмногу ви одговараат и направете ги дел од вашата лична практика. Со редовна работа, сигурна сум дека вашето тело ќе ви биде благодарно :)

Дали знаете која е најопасната „безопасна“ работа која секојдневно ја правиме? Долгочасовно седење. Токму така. Седењето со часови може да придонесе кон развој на бројни заболувања. Особено страдаат колковите, р’бетниот столб, вратот и рамењата. Поради неправилното држење, градниот кош се „затвора“ и дишењето е неправилно, што, пак, се одразува на тоа како се чувствуваме на физичко, ментално и енергетско ниво. Крупните мускулни групи во нозете и задникот слабеат, а мускулите кои ги креваат нозете (флексорите на колковите) се стегаат. Таа комбинација од фактори може да придонесе кон болки во лумбалниот дел од р’бетот. Долгочасовно седење може да предизвика дијабетис, висок крвен притисок, кардио-васкуларни заболувања, зголемен ризик од срцев и мозочен удар, одредени форми на рак, особено кај жените, проширени, варикозни вени, поради собирањето на крвта во нозете за време на седењето, анксиозност, депресија… Она што особено загрижува е тоа што дури и ако редовно вежбаме, сепак ризикуваме здравствени проблеми доколку остатокот од денот го минуваме неактивни и седејќи. Решение би можеле да бидат активни „мини - паузи“ во текот на целиот ден. На пример, на секои два три часа, да станеме од столчето, нежно да го раздвижиме телото и да се растегнеме. Акумулираниот ефект може да биде многу позитивен. Во ова видео давам неколку идеи како би можеле преку едноставни, интуитивни и природни движења да го активираме нашето тело и барем делумно да го неутрализираме негативниот ефект на долгочасовното седење. Одберете го она што ви е потребно, адаптирајте го на сопствените можности, додадете нешто свое... она е што е најважно е да се движите :)

Драги пријатели, ми претставува задоволство да го споделам со вас новото видео во серијалот терапевтски јога видеа. Тоа е целосно посветено на рачните зглобови, а содржи едноставни, но ефикасни вежби за одржување на нивното оптимално здравје и опсег на движења. Овие вежби можат да го неутрализираат негативното влијание на долгочасовната работа на компјутер или други видови спортски активности, на пример - склекови, баланси на раце и слично. Се надевам дека ќе ви се допадне и ќе најдете нешто полезно за вас.

Со комбинација од разновидни вежби работиме на благо растегнување и зајакнување на мускулите на горниот и долниот дел од телото посебно. Ги раздвижуваме рамениците, ги отвораме градите, го движиме рбетот во сите насоки, работиме на колковите, бедрата и мускулите на нозете.

Овој сплет вклучува вежби кои главно го таргетираат долниот дел од телото - колковите и нозете, солидно работат грбот и стомачните мускулите, а рацете и рамниците добиваат блага стимулација.

Во овој сплет се вклучени вежби кои главно се изведуваат од положбата масичка - колковите над колената, рамениците над дланките, грбот во неутрална положба. Нежно, со природни движења го стимулираме рбетот, работиме на зајакнување на јадрото, растегнување на мускулите на задникот, бедрата и нозете, работиме на координација на движењата на горните и долните екстремитети, ја подобруваме рамнотежата, легнати на стомакот го зајакнуваме грбот и ги отвораме градите.

Меѓудругото овој сплет вклучува вежби од првата Паванмуктасана серија од Бихар Јога школата, а има за цел раздвижување на зглобовите, нежно растегнување и зајакнување на мускулите во горниот дел од телото, раздвижување на рбетот, подобрување на координацијата на движењата.

Меѓудругото, овој сплет вклучува вежби од првата Паванмуктасана серија од Бихар школата за јога, а има за цел раздвижување на зглобовите, нежно растегнување и зајакнување на мускулите во долниот дел од телото, раздвижување на рбетот, подобрување на координацијата на движењата и рамнотежата.

Сплет на вежби базиран на втората серија Паванмуктасана од Бихар школата за јога. Наменета е за стимулација на органите и зајакнување на мускулите во абдоминалниот дел од телото. Бројот на повторувања на секоја од вежбите одредете го самите во рамките на вашите капацитети, но водете сметка тој да биде еднаков на двете страни и во обете насоки. Контраиндикации: проблеми со срцето, висок крвен притисок, ишијас, кила, проблеми со лумбалниот дел од рбетот и сакрум. Консултирајте се со лекар пред започнување на каков било режим на вежбање.